الترويح الرياضي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

الترويح الرياضي

الاهتمام بعلوم وتطبيقات الترويح الرياضي
 
ا.د يحيي حسنالرئيسيةالتسجيلدخول

مؤسسة الخير للكل للتنمية المستدامه منظمة غير حكومية مشهورة بوزارة التضامن بالجيزة شارك معنا في مبادرات الخير

 

 الترويح الفني

اذهب الى الأسفل 
كاتب الموضوعرسالة
رائد النفيعي
ترويحي متميز
ترويحي متميز



عدد الرسائل : 12
تاريخ التسجيل : 10/10/2011

الترويح الفني Empty
مُساهمةموضوع: الترويح الفني   الترويح الفني Emptyالجمعة مارس 16, 2012 10:24 pm

مصر كان فيها مغنيين كتير منهم مشاهير و العاده ان الناس كانت بعد المغربيه تخرج تدور على اماكن بيغنى فيها مغنيين و يقضوا سهراتهم فى السمع و الفرجه و أكل الجبنه المقليه و الزلابيه. المغنى " ابن رحاب " اللى عاش فى عهد السلطان الأشرف قايتباى كانت ليه شهره كبيره و كان بيحييى الحفلات و الأفراح. من الفنون اللى انتشرت كمان كان " خيال الضل " اللى كان بيوازى المسرح دلوقتى. خيال الضل كان بيتعرض فى مسارح و فى الجناين و كمان فى الأفراح و الاحتفالات. جنب خيال الضل كان فيه كمان الأراجوز و عروض الحيوانات و عروض عسكريه موسيقيه و ألعاب ناريه. القهاوى كانت كمان من أماكن الترويح و بالذات قهاوى " الحكاواتيه " اللى كانت متخصصه فى الحواديت الشعبيه زى " سيرة الظاهر بيبرس " فكانت الناس بتروح تقعد فيها تشرب مشاريب و تسمع حكايات " الحكاواتى ".

النيل بطبيعة الحال كان بيلعب دور كبير فى الترويح عن المصريين فكانت الناس بتخرج تتفسح على شطه و يركبوا مراكب و يغنوا و يطبلوا و يرقصوا. جزيرة الروضه كانت من الأماكن المحببه عند المصريين.

المصريين كانوا شعب مرح بيحب البهجه و الفرحه بعكس الشعوب المتجهمه المبلمه اللى كانت عايشه عيشه ضنك فى ضلال التابوهات و العنف حوالين مصر و كانت مصر بالنسبه لها جنه و دى حاجه لاحظها الرحاله اللى زاروا مصر اياميها و منهم ابن بطوطه. النيل نفسه كان ساعات بيتحول لحبيب فكانت الناس بتغنى له بالطبل و الزمر و تقول :





‎ النيل أوفى فى أبيب .:. خش يا حبيب
و بقينا فى هنا .:. يا فرحنا ‎




الاحتفالات بالأفراح و الطهور كانوا منتشرين فى مصر و كانت الأفراح بتتعمل فى صالات بتتأجر و كان بيحييها المغنيين و العوالم ، و كانت بتتعمل زفه للعرسان ، و كانت بتتغنى للعرايس اغانى مرحه كان من كلماتها : " انجلى يا ست العرايس .:. يا عزيزه فى الأهالى ". و لغاية النهارده لسه فى مصر كلام كان بيتقال فى الأفراح و حفلات الطهور فى العصور الوسطى زى " شوبش " و " عقبال عندوكوا " و " برجالاتو برجالاتو .:. حلق دهب فى وداناتو ".

الفنون الشكليه زى العماره و التصوير و النحت و الزخرفه برع فيها الحرفيين المصريين فى العصور الوسطى ، و بيظهر فى الأثار اللى لسه موجوده فى مصر مدى التنوع و التناسق و الإتقان فى مختلف العناصر المعماريه. بوجه عام المعمار و الفنون الشكليه فى مصر كانت مصريه صميمه منبثقه من الثقافه و التراث المصرى و بيتميزوا عن أى طراز فنى كان سايد فى العالم اياميها سواء بيزنطى أو غيره.

بصفه عامه مصر فى عصورها الوسطى كانت متطوره و متقدمه اكتر عن اوروبا العصور الوسطى و فضلت على الحال ده لغاية ما بدأ نظامها السياسى ينحدر فى اواخر العصر المملوكى و بعدين غيمت الدنيا و دخلت فى عصر مظلم يشبه عصور الظلام بعد احتلال العثمانليه ليها سنة 1517 و فضلت فى كبوتها لغاية عهد محمد على فبدإت تنهض من جديد ، و لسه لغاية النهارده بتكافح و بتناضل عشان ترجع لنفسها
الرجوع الى أعلى الصفحة اذهب الى الأسفل
 
الترويح الفني
الرجوع الى أعلى الصفحة 
صفحة 1 من اصل 1
 مواضيع مماثلة
-
» تعريف الترويح, خصائص الترويح
» تعريف وقت الفراغ-خصائص الترويح-تعريف الترويح-طرق قياس وقت الفراغ-لعبتين شعبيه و مبتكره
» الترويح في الاسلام
» ما مفهوم الترويح؟
» الترويح عن النفس

صلاحيات هذا المنتدى:لاتستطيع الرد على المواضيع في هذا المنتدى
الترويح الرياضي :: المقررات العلمية لطلاب الترويح الرياضي :: مقررات الطلاب المتخصصين في الترويح-
انتقل الى: